Featured Post

ആർഷദർശനങ്ങൾ - പുതിയ പുസ്തകം!

എന്റെ മൂന്നാമത്തെ പുസ്തകം പുറത്തിറങ്ങിയിരിക്കുന്നു. പേര് - ആർഷദർശനങ്ങൾ! ഫിലോസഫി/ദർശനം ആണ് വിഷയം. ഭാരതീയ ദർശനങ്ങളിൽ (പ്രത്യേകിച്ചും അദ...

Thursday, October 15, 2009

ചെറുവാളൂരിന്റെ മാള്‍ഡീനി

“പ്രിയപ്പെട്ട നാട്ടുകാരെ കഴിഞ്ഞ ഒരാഴ്ചയായി വാളൂര്‍‌സ്കൂൾ മൈതാനിയെ പുളകം‌കൊള്ളിക്കുന്ന ഫുട്ബാള്‍‌മേള ഇന്നുവൈകീട്ട് കൊടിയിറങ്ങുകയാണ്. ചോളാൻ ബീരാവു സെയ്‌ദ് മുഹമ്മദ് എവറോളിങ്ങ് ട്രോഫിക്കുവേണ്ടിയുള്ള ഇന്നത്തെ കലാശപ്പോരാട്ടത്തിൽ ചെറുവാളൂരിന്റെ സ്വന്തം ടീം വാളൂർ ബ്രദേഴ്സ് ബദ്ധവൈരികളും അയല്‍ക്കാരുമായ അന്നമനട ബ്ലൂമാക്സിനെ നേരിടുന്നു. വിജയികള്‍ക്കുള്ള സമ്മാനദാനം നിര്‍വഹിക്കുന്നത് ചാലക്കുടിയുടെ കറുത്തമുത്ത് കലാഭവൻ മണിയാണ്. പ്രസ്തുതചടങ്ങിനു സാക്ഷ്യം വഹിക്കുവാൻ നിങ്ങളോരോരുത്തരേയും സ്കൂൾ ‌ഗ്രൌണ്ടിലേക്കു വിനയപൂര്‍വ്വം സ്വാഗതം ചെയുന്നു“

വൈദേഹി ഓട്ടോയിലിരുന്നു വാളൂർ ബ്രദേഴ്സിന്റെ സ്റ്റോപ്പര്‍‌ബാക്ക് ഗിരിബാബുവിന്റെ അനൌണ്‍‌സിങ്ങ്. ആദ്യത്തെ പറച്ചിലിനുശേഷം സെറ്റിലൂടെ പാട്ട് ഒഴുകിയെത്തി. ഗിരി ദീര്‍ഘമായി നിശ്വസിച്ച് ഒരുപിടി നോട്ടിസുകൾ ഓട്ടോക്കു പിന്നാലെ ഓടിവന്ന പിള്ളേരുടെനേരെ എറിഞ്ഞു. പിന്നെ മൈക്ക് വീണ്ടും കയ്യിലെടുത്തു അനൌണ്‍സിങ്ങ് പുനരാരംഭിച്ചു.

“പ്രിയപ്പെട്ട നാട്ടുകാരെ...”

അന്നമനട ബസ്‌സ്റ്റാന്റിനു സമീപമുള്ള മൈതാനത്തു ഫ്ലഡ്‌ലൈറ്റിൽ നടത്തുന്ന ഫുട്ബാള്‍‌മേള കഴിഞ്ഞാല്‍‌പിന്നെ നാട്ടിൽ പ്രാധാന്യം വാളൂരിലെ ടൂര്‍ണമെന്റിനാണ്. തൃശൂർ തൊട്ടു എറണാകുളം വരെയുള്ള സകലടീമുകളും ഒരുതവണയെങ്കിലും ഈ ടൂര്‍ണമെന്റിൽ പങ്കെടുത്തിട്ടുണ്ട്. റൈസിങ്ങ്‌സ്റ്റാർ പരിയാരം, തിരുമുടിക്കുന്ന് സൂപ്പര്‍‌സ്റ്റാര്‍സ്, വൈന്തല സെന്റ്‌ആന്റണീസ് തുടങ്ങിയവയാകട്ടെ എല്ലാവര്‍ഷവും പങ്കെടുക്കുന്ന ടീമുകളും. ഇതുവരെയുള്ള പ്രകടനങ്ങളിൽ മികച്ച റെക്കോര്‍ഡ് റൈസിങ്ങ്‌സ്റ്റാർ ടീമിനാണ്. അതിൽ തുടര്‍ച്ചയായി മൂന്നുതവണ കപ്പ് പരിയാരത്തേക്കു പോയതും ഉൾപ്പെടും.

നാട്ടുകാരുടെ ഇഷ്‌ടടീം ആണെങ്കിലും മിക്ക ടൂര്‍ണമെന്റുകളിലും വാളൂര്‍‌ബ്രദേഴ്സിന്റെ പ്രകടനം ലോകക്രിക്കറ്റിൽ സൌത്ത്‌ ആഫ്രിക്കയുടേതിനു സമാനമാണ്. ലീഗ്‌ റൌണ്ടുകൾ അനായാസം ജയിച്ചുകയറി സെമിയിൽ തോറ്റുപുറത്തായിട്ടുള്ളത് ഒന്നും രണ്ടും തവണയല്ല. 1997ൽ നടത്തിയ ടൂര്‍ണമെന്റിൽ ഫൈനൽ വരെയെത്തിയതാണ് ബ്രദേഴ്സിന്റെ ഇതുവരെയുള്ള മികച്ച പ്രകടനം. ഫൈനലിൽ റഫറി അന്യായമായി അനുവദിച്ച പെനാല്‍റ്റിമൂലം അന്നമനടയോടു തോല്‍‌വി സമ്മതിക്കേണ്ടിവന്നു.

തോല്‍‌വികൾ നിറഞ്ഞ പൂര്‍വ്വകാല ചരിത്രത്തെയാകെ അപ്രസക്തമാക്കുന്ന കുതിപ്പാണ് ഇത്തവണ ബ്രദേഴ്സ് നടത്തിയത്. പതിവിനു വിപരീതമായി ലീഗ്റൌണ്ടിൽ പരുങ്ങിയെങ്കിലും പ്രീ‌ക്വാര്‍ട്ടറിനു ശേഷമുള്ള ജയങ്ങളെല്ലാം അധികാരികമായിരുന്നു. ഫൈനലിൽ അന്നമനടയെകൂടി മുട്ടുകുത്തിച്ചാൽ പിന്നെയെല്ലാം ചരിത്രമാണ്.

വൈദേഹിയോടൊപ്പം അനൌണ്‍സ്‌മെന്റ് ചെറുവാളൂർ പത്രോസു‌പടി ബസ് സ്റ്റോപ്പിലെ ദാസന്റെ ചായപ്പീടികയെ കടന്നുപോയി. കടയിലെ ചര്‍ച്ചാവിഷയം പന്തുകളിയായി. ചായഗ്ലാസ്സ് മൊത്തി ലൈന്‍‌മാൻ അഴകപ്പൻ ആരോടെന്നില്ലാതെ പറഞ്ഞു.

“ഇന്നു ജയിക്ക്വോ ആവോ?”

അന്നമനടയിൽ ഭാര്യവീടുള്ള വറീതേട്ടനു സംശയമില്ലായിരുന്നു. തുടര്‍ച്ചയായ നാലാംതവണയും കപ്പ് ഉറപ്പിച്ചുവന്ന റൈസിങ്ങ്‌സ്റ്റാർ പരിയാരത്തെ മറുപടിയില്ലാത്ത അഞ്ചുഗോളുകള്‍ക്കു തുരത്തിയ അന്നമനടയുടെ നീലപ്പട ജയിക്കുമെന്നു അദ്ദേഹം കട്ടായം പറഞ്ഞു.

“അന്നമനടക്കാണ് ഞാൻ സാദ്ധ്യത കാണണെ. പരിയാരത്തിനെതിരെ എന്തൂട്ട് കളിയായിരുന്നു അവന്മാരുടെ”

“ഫ്‌ഭാ
” ഉഗ്രമായ ആട്ടലോടെ അഴകപ്പന്‍ ചാടിയെഴുന്നേറ്റു. ആരൊക്കെയോ അദ്ദേഹത്തെ വട്ടം‌പിടിച്ചു. “ഇവനെപ്പോലുള്ളോരാ പ്രശ്നം. ചോറിവിടേം കൂറവിടേം”

ദാസൻ അഴകപ്പനെ ആശ്വസിപ്പിച്ചു. അന്നേരം ഗിരിബാബു ഒരു ബൈക്കിൽ വന്നിറങ്ങി. ആരോടും ഒന്നും മിണ്ടാതെ തലക്കു കൈകൊടുത്തു ബെഞ്ചിലിരുന്നു. വൈദേഹിയിൽ ഉത്സാഹത്തോടെ പോയ ഗിരിയല്ല ഇപ്പോൾ വന്നിരിക്കുന്നത്. ആകെ നിരാശനായ മട്ട്.

അഴകപ്പൻ അന്വേഷിച്ചു. “എന്താ ഗിര്യേ നിനക്കൊരു പൊറുതികേട്?”

ഗിരി ചോദ്യം ഗൌനിച്ചില്ല. ചായക്കു വിളിച്ചുപറഞ്ഞു. എല്ലാവരും അടുത്തുകൂടി.

“എന്തേലുമൊന്ന് പറേടാ ഗിര്യേ. ഇന്നത്തെ കളി നമ്മ ജയിക്കില്ലേ?”

തല ഉയര്‍ത്താതെ ഗിരിബാബു വിപരീതാര്‍ത്ഥത്തിൽ കൈത്തലമനക്കി. “സംശയാ!”

“അതെന്താ നീ അങ്ങനെ പറഞ്ഞെ. നമക്കീ കളി അങ്ങനങ്ങട് തോറ്റുകൊടുക്കാന്‍ പറ്റ്വോ. തൊണ്ണൂറ്റേഴിലെ ഫൈനൽ നിയ്യ് മറന്നോ?” അഴകപ്പൻ ആശങ്കാകുലനായി.

“മറന്നട്ടൊന്നൂല്ല്യാ”

“പിന്നെന്താ നീ തോല്‍ക്കൂന്നൊക്കെ പറേണെ”

ഗിരി ചുറ്റുമുള്ളവരെ നിരാശയോടെ നോക്കി. എല്ലാവരും ആകാംക്ഷയിലാണ്.

“നമ്മടെ നാണൂന്റെ കണ‌ങ്കാൽ ഉളുക്കി. ഇന്ന് ചെലപ്പോ കളിക്കില്ല”

ചായക്കട പൊടുന്നനെ നിശബ്ദമായി. നാണു ഇല്ലെങ്കിൽ...

അതാണു നാണു എന്ന അപരനാമത്തിൽ പരക്കെ അറിയപ്പെടുന്ന കക്കാട് ലക്ഷംവീട് കോളനിയിലെ നാണപ്പന്റെ മൂത്തപുത്രന്‍ സുരേഷ്. എതിര്‍‌ടീമുകൾ ഇദ്ദേഹത്തെ വിശേഷിപ്പിക്കുക വാളൂർ ബ്രദേഴ്സിന്റെ പൌളോ മാള്‍ഡീനിയെന്നാണ്. ആറടിയോളം ഉയരം. ഇരുനിറം. കട്ടിമീശ. എപ്പോഴും വെറ്റില മുറുക്കുന്ന സ്വഭാവം. വളരെ ചെറിയ വയർ. വിസ്തൃതമായ വിരിഞ്ഞ നെഞ്ച്. ഫുട്ബാൾ നിരന്തരം കളിക്കുന്നതിനാൽ അടിമുടി അത്‌ലറ്റിക് ലുക്ക് . ഫുട്ബാൾ മൈതാനത്തു ചിതറിയ തലമുടിയോടെ കൈമെയ് മറന്നുകളിക്കുന്ന ഇദ്ദേഹമാണു ബ്രദേഴ്സിന്റെ പ്രതിരോധനിരയിലെ ആണിക്കല്ല്.

അസ്സൂറികളുടെ കറ്റനേഷ്യന്‍ പ്രതിരോധത്തിനു സമാനമാണ് ബ്രദേഴ്സിന്റെ കിടയറ്റ ഡിഫന്‍സ്. പൊക്കം കുറവെങ്കിലും ഉറച്ച ബോഡിയുള്ള ഗിരിബാബു എന്ന ഛോട്ടാഗിരി. കളിമിടുക്കുകൊണ്ടും അതിലുപരി തിണ്ണമിടുക്കുകൊണ്ടും എതിര്‍ടീം കളിക്കാരെ നേരിടുന്ന നഫീല്‍ക്ക. ഡ്രിബ്ലിങ്ങിന്റെ പര്യായമായ സഖാവ് രാമന്‍ എന്ന രാമഭദ്രൻ‍. ഒടുവിൽ പ്രതിരോധനിരയിലെ ആണിക്കല്ലായ നാണു എന്ന പൌളോ മാള്‍ഡീനിയും. ഏതു ആക്രമണനിരയുടേയും മുനയൊടിക്കുന്ന എണ്ണംപറഞ്ഞ ഈ പ്രതിരോധനിരയാണു വാളൂര്‍ബ്രദേഴ്സിന്റെ ശക്തിദുര്‍ഘം. ഈ ടൂര്‍ണമെന്റിൽ ബ്രദേഴ്സ് ഇതേവരെ ഗോൾ വഴങ്ങാത്തതിന്റെ കാരണവും മറ്റൊന്നല്ല. മുന്നേറ്റ‌നിരയിൽ വിശ്വസ്തരായ രാജീവനും നിര്‍മല്‍കുമാറുമാണെങ്കിൽ മിഡ്ഫീല്‍ഡ് പടയെ നയിക്കുന്നത് നസീര്‍ക്കയാണ്. സ്റ്റേറ്റ്തലത്തിലും അഖിലേന്ത്യാതലത്തിലും കളിച്ചു തഴക്കംവന്ന നസീര്‍ക്കയാണ് ബ്രദേഴ്സിന്റെ നായകൻ‍.

വാളൂര്‍ദേശത്തിനടുത്തു പുളിക്കകടവ് പാലം കടന്നാലെത്തുന്ന നാടാണ് അന്നമനട. പ്രശസ്ത താളവിദ്വാന്മാരായ അന്നമനട അച്ചുതമാരാർക്കും പരമേശ്വരമാരാർക്കും ജന്മം‌കൊടുത്ത നാട്. അന്നമനടയിലെ ഫുട്‌ബാൾ ടീമും സുശക്തമാണ്. അബ്ദുൾ സിദ്ധിക്ക് – സഗീർ ഇരട്ടസഹോദരന്‍‌മാരിലാണ് അവരുടെ തന്ത്രങ്ങൾ കേന്ദ്രീകരിച്ചിരിക്കുന്നത്. ഈ ടൂര്‍ണമെന്റിൽ അന്നമനടയുടെ നീലപ്പടയാണ് മികച്ച കളി പുറത്തെടുത്ത ടീമെന്നു പറഞ്ഞാൽ അതിൽ അതിശയോക്തിയില്ല. റൈസിങ്ങ് സ്റ്റാർ പരിയാരത്തിനെതിരെ അവരുടെ കളി അത്ര പിഴവറ്റതായിരുന്നു. ഫൈനലിൽ ഒരു വാക്കോവർ പ്രതീക്ഷിക്കേണ്ടെന്നു വാളൂരിലെ എല്ലാവര്‍ക്കും ഉറപ്പായിരുന്നു. നാണുകൂടി കളിച്ചില്ലെങ്കിൽ തോല്‍ക്കുമെന്ന കാര്യത്തിൽ തര്‍ക്കവും വേണ്ട.

ചായക്കടയിലുള്ളവർ പിറുപിറുത്തു അങ്ങിങ്ങായി ഇരുന്നു. അഴകപ്പൻ അന്വേഷിച്ചു.

”ഗിര്യേ... നാണൂന് ഒട്ടും പറ്റില്ലേ കളിക്കാൻ”

ഗിരി വിശദമാക്കി. “വാര്‍ക്കപ്പണിക്ക് പോയപ്പോ പറ്റിയതാ. വലിയ പെയിനില്ല. പക്ഷേ ഡോക്ടർ കളിക്കരുതെന്നാ പറഞ്ഞത്”

”നസീർ എന്താ പറയണെ?”

അതിനുത്തരമായി ഗിരി ചിരിച്ചു. “കളിക്കല്ലാണ്ട് എന്തുവഴി”

വൈകീട്ടു നാലുമണിയോടെ വാളൂർ സ്കൂള്‍ഗ്രൌണ്ട് നിറഞ്ഞു കവിഞ്ഞു. കാതിക്കുടം, അന്നനാട്, വെസ്റ്റ് കൊരട്ടി, കുലയിടം എന്നിവിടങ്ങളില്‍നിന്നു വന്നവർ ഇരുടീമുകള്‍ക്കുമായി ആര്‍പ്പുവിളിച്ചു. ബ്രദേഴ്‌സ്‌ ടീം ഗ്രൌണ്ടിലിറങ്ങി പ്രാക്ടീസ് തുടങ്ങിയപ്പോൾ നാണു ഇല്ലെന്നറിഞ്ഞു അന്നമനട പക്ഷക്കാർ കരഘോഷം മുഴക്കി. കളി ആരംഭിക്കുന്നതിനു പത്തുമിനിറ്റു മുമ്പ് കലാഭവന്‍‌മണി എന്‍ഫീല്‍ഡിൽ എത്തി. കൂടെ ഒരു സ്നേഹിതനും. കളിക്കാരെ പരിചയപ്പെട്ടശേഷം കുറച്ചുസമയം പന്തുതട്ടുകയും ചെയ്തു.

ടൂര്‍ണമെന്റിൽ ഇതുവരെ രണ്ടുടീമുകളും കളിച്ചത് 4-4-2 ശൈലിയിലായിരുന്നു. ഫൈനല്‍‌വരെ മികച്ചപോരാട്ടമാണ് ഇരുടീമുകളും പുറത്തെടുത്തതെങ്കിൽ നാണുവിന്റെ അഭാവം ബ്രദേഴ്സിന്റെ പ്രതിരോധത്തെ വളരെ ദുര്‍ബലപെടുത്തിയിരുന്നു. ആദ്യപകുതിയിൽ അതു തെളിഞ്ഞുകണ്ടു.

(0 – 1). ബ്രദേഴ്സ് പിന്നിൽ!

ഗോളി സുമോദിന്റെ തകര്‍പ്പൻ സേവുകൻ കൂടി ഇല്ലായിരുന്നെങ്കിൽ സ്ഥിതി ഇതിലും ദയനീയമാകുമായിരുന്നു. ആശയപ്പൊരുത്തം നഷ്ടമായ ബ്രദേഴ്സിന്റെ പ്രതിരോധനിരയെ കാഴ്ചക്കാരായി നിര്‍ത്തി അന്നമനടയുടെ നീലക്കുപ്പായക്കാർ ഇഷ്ടംപോലെ കയറിയും ഇറങ്ങിയും കളിച്ചു. പകുതി സമയമായപ്പോഴേക്കും ഇത്തരം കളികൊണ്ടു ഫൈനൽ ജയിക്കാനാകില്ലെന്നു നസീര്‍ക്കക്കും മനസ്സിലായി.

രണ്ടാം പകുതി തുടങ്ങുന്നതിനുമുമ്പ് വീട്ടിൽ ഇരിക്കപ്പൊറുതിയില്ലാതെ ബെല്ലും ബ്രേക്കുമില്ലാത്ത സൈക്കിൾ മെല്ലെചവിട്ടി, കാരിയറിൽ ബൂട്ടും ഷോര്‍ട്സുംവച്ചു നാണു എത്തി. വായിലെ മുറുക്കാന്‍ തുപ്പിക്കളഞ്ഞു വിവരങ്ങൾ അന്വേഷിച്ചു. ഡിഫന്‍സ് ഒട്ടും ശരിയാകുന്നില്ലെന്നു ഗിരിബാബു. രണ്ടാം പകുതിയിൽ പതിവുശൈലിയായ 4-4-2 ഉപേക്ഷിച്ചു പ്രതിരോധത്തിനു മുന്‍‌തൂക്കമുള്ള 4-5-1 ലേക്കു മാറി, തല്‍ക്കാലം കൂടുതൽ ഗോളുകൾ വീഴുന്നതു തടഞ്ഞു അവസാ‍നം ആഞ്ഞടിക്കാനാണ് പ്ലാനെന്നും കൂട്ടിച്ചേര്‍ത്തു.

ഈ സംഭാഷണങ്ങള്‍ക്കിടയിൽ നാണുവിന്റെ വരവ് ബ്രദേഴ്സ് പക്ഷക്കാര്‍ക്കിടയിൽ ഓളങ്ങളും അന്നമനടക്കാര്‍ക്കിടയിൽ ആശങ്കകളും സൃഷ്ടിച്ചു. കടുത്ത ബ്രദേഴ്സ് ഫാനും, പ്രതിഭാധാരാളിത്തം ഒന്നുകൊണ്ടുമാത്രം അവസാന ഇലവനിൽ സ്ഥലം ലഭിക്കാതിരുന്ന ബൈജു നാണുവിന്റെ വരവ് ടീമിനു ഉണര്‍വുണ്ടാക്കുമെന്നു അഭിപ്രായപ്പെട്ടു. ബൈജു ചൂടാകുമെന്നതിനാൽ ആരും ആ അഭിപ്രായത്തെ എതിര്‍ക്കാൻ പോയില്ല.

രണ്ടാം പകുതി തുടങ്ങിയപ്പോൾ ബ്രദേഴ്സിന്റെ 4-5-1 ശൈലിയിലേക്കുള്ള ചുവടുമാറ്റം അന്നമനടയുടെ നീലപ്പടയെ ഇരട്ടി ആവേശത്തിലാക്കി. അവർ കടുത്ത ആക്രമണശൈലിയായ 3-5-2 പരീക്ഷിച്ചു. മിനിറ്റുകൾ കൊഴിഞ്ഞുകൊണ്ടിരുന്നു. കേളീശൈലി മാറ്റിയിട്ടും ബ്രദേഴ്സിന്റെ ഡിഫന്‍സ് ക്ലച്ച് പിടിച്ചില്ല. ബോൾ കൈവശംവക്കുന്ന കാര്യത്തിൽ അന്നമനട വളരെ മുന്നിൽ. കളിതീരാന്‍ ഇരുപതുമിനിറ്റു മാത്രം ബാക്കിയുള്ളപ്പോൾ അബ്ദുൾ സിദ്ദിക്കിന്റെ ഒരു ചൂടന്‍ഷോട്ട് ഗോളി സുമോദ് കുത്തിക്കളഞ്ഞത് ഗോള്‍പോസ്റ്റിൽ തട്ടി റീബൌണ്ട് ചെയ്തപ്പോൾ നസീര്‍ക്ക ദീര്‍ഘമായി നിശ്വസിച്ചു. പിന്നെ റഫറിയെ നോക്കി കൈകൾ കറക്കി.

സബ്സ്റ്റിറ്റ്യൂഷൻ!
അതെ. ചെറുവാളൂർ വിളിക്കുന്നു, അവരുടെ പൌളോ മാള്‍ഡീനിയെ. ഗ്രൌണ്ടിനെതൊട്ടു നെറുകയിൽവച്ച്, കട്ടിമീശയുടെ അഗ്രം നാക്കുകൊണ്ടു വളച്ചു വായക്കുള്ളിലാക്കി ചാടിയോടി നാണു ഇറങ്ങി.

കാണികള്‍ക്കിടയിൽ മര്‍മരം ഉയര്‍ന്നു. “നാണു... നാണു”
അതു ക്രമേണ ആരവമായിമാറി.

നാണു ഇറങ്ങിയ ഉടന്‍ നസീര്‍ക്ക ശൈലി 4-4-2 ലേക്കു മാറ്റി. തന്റെ വിശ്വസ്തനായ സ്റ്റോപ്പർ ബാക്കിനെ നോക്കി ഗോളിസുമോദ് വലതുകൈ നെഞ്ചിൽ ഊക്കിലടിച്ചു. പിന്നെ ഓടിവന്നു നാണുവിന്റെ തലയുമായി തല പതുക്കെ കൂട്ടിയിടിച്ചു. ബ്രദേഴ്‌സ് ആരാധകർക്കിടയിൽ വിസിലടികൾ ഉയര്‍ന്നു. കളി വീണ്ടും പുനരാരംഭിച്ചപ്പോൾ നാണുസുരേഷ് ആരാണെന്നു അന്നമനടക്കാര്‍ക്കു മനസ്സിലായി. പ്രതിരോധത്തിലെ വലക്കണ്ണികൾ മുറുക്കിയും ആവശ്യം പോലെ കയറിക്കളിച്ചും ഡിഫന്‍സിൽ നാണു അജയ്യനായി നിന്നു.

കളിയുടെ എണ്‍‌പതാം മിനിറ്റിൽ ഗിരിയുടെ ഒരു ലോങ്ങ്‌റേഞ്ച് ഷോട്ട് അപ്രതീക്ഷിതമായ നീക്കത്തിലൂടെ മിഡ്ഫീല്‍ഡിലുള്ള നസീര്‍ക്ക ഇടതുവിംഗിലേക്കു മറിച്ചപ്പോൾ നാണു അത് ഓടിയെടുത്തു കുതിച്ചു. രണ്ടു കളിക്കാരെ നിഷ്‌പ്രയാസം കബളിപ്പിച്ചുള്ള ആ വരവുകണ്ടപ്പോൾ ബ്ലൂമാക്സിന്റെ ഡിഫന്റർ ജിന്‍സ്‌ ജോയിക്കു എന്തുചെയ്യണമെന്ന കാര്യത്തിൽ സംശയമില്ലായിരുന്നു. കടുത്ത ടാക്കിളിങ്ങ്. അത്തരമൊരുനീക്കം പ്രതീക്ഷിച്ചിരുന്ന നാണു ഒഴിയാന്‍ ശ്രമിച്ചെങ്കിലും തുടയെ രക്ഷിക്കാന്‍ പറ്റിയില്ല.

രണ്ടുകൈകളും ഉയര്‍ത്തി നിലത്തുകിടക്കുന്ന നാണുവിനെ പുച്ഛത്തോടെനോക്കി ‘ഞാനൊന്നുമറിഞ്ഞില്ലേ‘ എന്നഭാവത്തിൽ നിന്ന ജിന്‍സിനെ അത്യാവശ്യം വണ്ണമുള്ള നഫീൽക്ക ആഞ്ഞുതാങ്ങി. ജിന്‍സ് ലംബമായി തെറിച്ചുപോകുന്നതു കണ്ടിട്ടും അദ്ദേഹവും ഞാനൊന്നും ചെയ്തില്ല എന്നഭാവത്തിൽ കൈപൊക്കി. റഫറിയുടെ വിസിൽ മുഴങ്ങി. രണ്ടുടീമിലെയും കളിക്കാര്‍ക്കിടയിൽ സംഘര്‍ഷമുണ്ടായി. കാണികള്‍ക്കിടയില്‍നിന്നു ജിന്‍സിനു നേരെ ആക്രോശിച്ചിറങ്ങിയ ബൈജുവിനെ ചിലർ പൊക്കിക്കൊണ്ടുപോയി അനുനയിപ്പിച്ചു ബാവയുടെ കടയില്‍‌നിന്നു സോഡ വാങ്ങിക്കൊടുത്തു. ഒന്ന് നാണുവിനും.

നാണുവിനെ ഫൌൾ ചെയ്തതിനു കിട്ടിയ ഫ്രീകിക്ക് നസീര്‍ക്ക, ഗാരിഞ്ച സ്റ്റൈൽ കരിയിലകിക്കിലൂടെ ഗോളാക്കുമ്പോൾ നാണു ഗിരിയുടെതോളിൽ കൈയിട്ടു തണുത്തസോഡ തലയിൽ ഒഴിക്കുകയായിരുന്നു. ഗോള്‍‌വല അനങ്ങിയതോടെ ലൈനരുകിൽ നിന്നിരുന്ന ബൈജുവും കൂട്ടരും ഗ്രൌണ്ടിലിറങ്ങി. വിസിലും ആര്‍പ്പും വിളിച്ചു അന്നമനടക്കാരെ പ്രകോപിപ്പിച്ചശേഷം റഫറിയുടെ കര്‍ശനനിര്‍ദേശത്തിനു വഴങ്ങി തിരിച്ചുകയറി.

സമനിലഗോൾ വീണശേഷം അന്നമനടക്കാർ ആക്രമണത്തേക്കാളുപരി പ്രതിരോധത്തിലാണ് ശ്രദ്ധിച്ചത്. നാണു ഉള്ളപ്പോൾ ആക്രമിച്ചിട്ടു കാര്യമില്ലെന്നു മനസ്സിലാക്കിയ അവരുടെ ലക്ഷ്യം പെനാല്‍റ്റി ഷൂട്ടൌട്ടാണെന്നു എല്ലാവര്‍ക്കും വ്യക്തമായിരുന്നു. പക്ഷേ ബ്രദേഴ്സിന്റെ മുന്‍‌നിരയിലെ രാജീവനു ചില പ്ലാനുകളുണ്ടായിരുന്നു. പന്ത് തങ്ങളുടെ ഹാഫില്‍നിന്നു വിടാതെ, എന്നാൽ മുന്നേറാതെയും, അങ്ങോട്ടുമിങ്ങോട്ടും തട്ടിമുട്ടി സമയംപോക്കിയിരുന്ന നീലപ്പടയെ കബളിപ്പിച്ചു രാജീവന്‍ പന്തുറാഞ്ചി മിഡ്ഫീല്‍ഡിലേക്കു മറിച്ചു. അവിടെനിന്നു ബോൾ സ്വീകരിച്ച നസീര്‍ക്ക ഇടതു വിംഗിലേക്കു ലോങ്‌റേഞ്ച് ഷോട്ടു തൊടുക്കുമ്പോൾ നാണു ജിന്‍സിനെ വെട്ടിച്ചു പായുകയായിരുന്നു. പന്തു നിലംതൊടുന്നതു കാത്തുനിന്ന സിദ്ധിക്കിന്റെ കണക്കുകൂട്ടലുകൾ തെറ്റിച്ച് നാണു പൊങ്ങിവന്ന പന്ത് കാലിലെടുക്കാതെ വിസ്തൃതമായ നെഞ്ചുകൊണ്ടുതന്നെ മാര്‍ക്ക് ചെയ്യപ്പെടാത്ത രാജീവനു മറിച്ചു. അപ്രതീക്ഷിതമായ ഒരു പാസ്. ഒന്നു വട്ടം‌തിരിഞ്ഞു രാജീവൻ തൊടുത്ത ഇടങ്കാലന്‍ ഷോട്ട് ഗോള്‍വലയിൽ പതിക്കുമ്പോൾ കളിതീരാൻ രണ്ടുമിനിറ്റു മാ‍ത്രം ബാക്കി. ബ്രദേഴ്സ് മുന്നിലും (2-1)

ബാക്കി സമയം അന്നമനട ടീം ആവതു ശ്രമിച്ചെങ്കിലും ബ്രദേഴ്സിന്റെ ഡിഫന്‍സിനെ കീഴ്പ്പെടുത്താനായില്ല. അങ്ങിനെ തൊണ്ണൂറ്റിയേഴിലെ പരാജയത്തിനു വാളൂർ ടീം കണക്കുതീര്‍ത്തു. ഇരുപതുമിനിറ്റു മാത്രം കളിച്ച നാണുവിനെ കളിയിലെ കേമനായി തിരഞ്ഞെടുക്കാന്‍ ആര്‍ക്കും അധികം ആലോചിക്കേണ്ടി വന്നില്ല. സമ്മാനം കൊടുത്തു നാണുവിനെ കെട്ടിപ്പിടിച്ചു മണി സ്വതസിദ്ധമായ ശൈലിയിൽ ചിരിച്ചു. “ങ്യാഹഹഹ”


ഫുട്ബാൾ ജീവശ്വാസമാക്കിയ ഒരു ജീവിതം. അതാണു നാണു സുരേഷ്. ഒരുകാലത്തു ആലുവ യു‌സി കോളേജിന്റെ ഗോള്‍‌കീപ്പറായിരുന്ന നാണു ഡിഫൻഡർ പൊസിഷനിലേക്കു കളം‌ മാറിയത് യാദൃശ്ചികമായിരുന്നു. അതിനുശേഷം പ്രതിരോധത്തിനു അദ്ദേഹം പുതിയ മാനങ്ങൾ തീര്‍ത്തു. ബ്രദേഴ്സിന്റെ പുത്തന്‍‌കൂറ്റുകാര്‍ക്കു അവയെല്ലാം പരിചിതവുമാണ്. നാണു എന്ന സുരേഷേട്ടന്‍ ഇന്നും ജീവിക്കുന്നു കക്കാട് ലക്ഷംവീട് കോളനിയിൽ, അവിവാഹിതനായി.

22 comments:

  1. നാണു : ചെറുവാളൂരിന്റെ പൌലോ മാള്‍ഡീനി എന്ന എന്റെ പഴയൊരു പോസ്റ്റിന്റെ റീവൈസ്‌ഡ് രൂപം. 25 ശതമാനത്തോളം ഭാഗങ്ങളില്‍ ചേഞ്ചുകള്‍ വരുത്തി. ഒപ്പം വാക്കുകളുടെ വിന്യാസത്തിലും ചില മാറ്റങ്ങള്‍.

    മുമ്പ് വായിച്ചിട്ടില്ലാത്തവര്‍ വായിക്കുക. വായിച്ചവര്‍ ഒന്നുകൂടി വായിക്കുക :-)

    എന്നും സ്നേഹത്തോടെ
    :-)
    സുനില്‍ || ഉപാസന

    ReplyDelete
  2. പണ്ട് വായിച്ചത് മറന്നിട്ടില്ല, ഒന്നൂടെ റിഫ്രഷ് ചെയ്തു.
    :)

    ReplyDelete
  3. ഇന്നത്തെപ്പോലെ റ്റി വി ഇല്ലായിരുന്ന കാലത്ത് സന്തോഷ്‌ട്രോഫി നടക്കുമ്പോള്‍ റേഡിയോ ആണ് ആശ്രയം അന്നു കളി വിഷ്വവലൈസ് ചെയ്തിരുന്നത് വാച്ചിന്റെ ഡയല്‍ നോക്കിയായിരുന്നു,
    ആ റേഡിയോ കമന്ട്റി ഓര്‍മ്മ വന്നു ഉപാസനയുടെ പോസ്റ്റ് വായിച്ചപ്പോള്‍ നല്ല വീര്യമുള്ള കമന്ററി പോലെ ആയി കഥ ഒ! കഥയല്ലല്ലോ...

    നാണുസുരേഷിനു അഭിവാദ്യങ്ങള്‍

    ReplyDelete
  4. Dear Paulose Bhai

    Thanks for your first comment in ma blog, althoough a regular reader.

    It boosts me very much
    :-)
    Upasana

    ReplyDelete
  5. nannayitundu..
    nalla vivaranam..
    aa rasam kathu sookshichan kazhinju..

    also u put another point. even people are brilliant in the game, some are loosing in the game of "life"..

    ReplyDelete
  6. Premaa (piLLEchchaa) :

    last line of your comment is a global truth sir.

    i wonder you began to say Truth!!
    :-)
    Upasana

    ReplyDelete
  7. മനോഹരം... ഒറ്റയിരിപ്പിന് ശ്വാസമടക്കിപ്പിടിച്ച് വായിച്ചു തീര്‍ത്തു. സുരേഷേട്ടനോട് അന്വേഷിച്ചതായി പറയുമല്ലോ..

    ReplyDelete
  8. footbaal valiya thaalparyamulla vishayamonnum allathirunnittum ottayiruppinu vaayichu theerthu. nannayittundu. maldeeniyekkurichu adhikam ariyilla. ariyaan shramikkatte. aashamsakal.

    ReplyDelete
  9. Sree : thanks for Second reading.

    Manikyam : not story. Naattu charitham enne vilicholoo :-)

    Kumaran : I am in native now, for two days. will see him.

    Anitha / Adukkala : Paulo Maldini Italian football team nte Defender aane. a veteran. search google. Thanks for your first comment

    SabkO Dhanyavaad
    :-)
    Sunil || Upasana

    ReplyDelete
  10. സുനീ...
    നല്ല ഒരു ഫുട്ബാള്‍ കളി കണ്ട സുഖം. ജയിച്ചത് നമ്മുടെ ടീമെന്നത് മറ്റൊരു സുഖം..

    സൂപര്‍ കമെന്ററി മച്ചാ. അഭിനന്ദനങ്ങള്‍.
    -സുല്‍

    ReplyDelete
  11. കമന്ററി കലക്കി... കൊള്ളാം നല്ല അനുഭവം
    നന്ദി
    :)
    :)
    :)
    3/3

    ReplyDelete
  12. സുന്ദരം ...എങ്കിലും എന്തും ചെറുതാവുമ്പോള്‍ കൂടുതല്‍ സുന്ദരം.... അല്ലെ?...ജീവികള്‍ , ..മതം ...പ്രസ്ഥാനം ..ചിന്തകള്‍ ..എഴുത്ത്‌ ..അങ്ങിനെ .... അങ്ങിനെ ....എല്ലാം...ഉദ്ദേശം മനസ്സിലായല്ലോ ... ? നന്നായി വരട്ടെ ....
    നന്‍മകള്‍ നേരുന്നു
    നന്ദന

    ReplyDelete
  13. very natural writing of you it is very interesting .

    ReplyDelete
  14. ശെരിക്കും ഒരു ഫുട്ബാള്‍ കളി കണ്ട പ്രതീതി..നന്നായിട്ടുണ്ട്..

    ReplyDelete
  15. This comment has been removed by a blog administrator.

    ReplyDelete
  16. valare eshtapettu changathi. zarikkum Nanuvine nerittu kantathupole. parayan vaakkukalilla

    ReplyDelete
  17. hai sunil..kandappol chetta ennu vilikaanaa adyam manassil vannath,pinne profilil kanda age athenne pinnottu valichu aa oru viliyil ninnu..valoor desam enikkum anyamalla...krishnante ambalathinodum schoolinodum chernu kidakunna aa groundil njanum etharund ente chettan sabu nte koode,kakshiyum brothersinte oru pazhaya tharam ayirunnu..ente amma padicha schoolinte a muttath njanum kandittundu kure maldeenimareyum pelemareyum...anyway memories e always sweet..

    ReplyDelete
  18. സുല്ലിക്ക :അതേന്ന്... മ്മടെ ടീമന്നെ.

    ഇര : ആദ്യവരവിനു നന്ദി

    നന്ദന്‍ : ഇത്രയേ ചെറുതാക്കാന്‍ പറ്റൂ.

    ഉണ്ണിമോള്‍ : താങ്ക്യൂ.

    തൃശൂര്‍കാരന്‍ : അപ്പോ ചാര്‍ജ്ജ് തരണം :-)

    പള്ളിക്കരയില്‍ : നന്ദി

    ചേച്ചിപ്പെണ്ണേ : :-)

    ഭാനുചേച്ചി : ഫീമെയിത്സിനും വളരെ ഇഷ്ടപ്പെടുമെന്നു കരുതിയ്ല്ല. കായികമല്ലേ വിഷയം. :-)

    പ്രസിത് : നാട്ടുകാരന്‍ ആണെന്നു അറിഞ്ഞതില്‍ സന്തോഷം. എന്റെ വീട് കക്കാടില്‍ ആണ്. എനിക്കു 3-4 സാബുമാരെ അറിയാം. താങ്കള്‍ എവിടെനിന്നാണെന്നു പറഞ്ഞില്ല. വീണ്ടും കാണാം :-)

    എല്ലാവര്‍ക്കും നന്ദി
    :-)
    എന്നും സ്നേഹത്തോടെ
    സുനില്‍ || ഉപാസന

    ഓഫ് : ഈ പോസ്റ്റിന്റെ ഒറിജിനല്‍ ഇവിടെ ( http://moooppan.blogspot.com/2007/11/blog-post.html ) വായിക്കാം...

    ReplyDelete